ABaKa, Ito Na Ang Katapusan

written and edited by Alliah Miranda

Kumusta?

Kinakaya mo pa ba?

Mga tanong sa isipan na tila hindi maiwasan

Marahil sa pabago-bago ng sistema ng panahon

Na tila ba tayo'y unti-unting nilalalamon

Naaalala ko pa no'n ang simpleng pamumuhay

Ikaw, ako, tayo, masaya lang na naglalaro

Tagu-taguan, langit-lupa, piko, patintero

Panahon, kung saan hindi pa moderno

Buo ang atensyon at interaksyon sa mundo

Gusto pa bang balikan? Ngunit papaano?

Ngayon tayo ay tila nakulong

Sa apat na sulok na may bubong

Tuwang-tuwang sa pagyakap ng modernisasyon

Nagawa mo na ba ang iyong obligasyon?

/A/ Ano nga ba ang dulot?

/Ba/ bakit nga ba tinatangkilik?

/Ka/ kahit ako, ay napapaisip

/Da/ Dahil ba sa kaginhawaan? Maituturing nga bang magandang

/E/ Ehemplo sa bagong henerasyon

/Ga/ Gaano ba talaga kahalaga, ang modernong teknolohiya

/Ha/ Hatid ba nito'y karunungan, kaginhawaan o katamaran?

/I/ Ito'y naging kabiyak na nang ating buhay

/La/ laman ng isip at usap-usapan

/Ma/ Mababago pa ba? O

/Na/ nakabiyak na hanggang sa pagtanda, at mga paparating na henerasyon

/Nga/ Ngayon ako'y napaisip

/O/ oras ay napakabilis

/Pa/ Paano maisasalba ang sanlibutan? Maisasalba pa nga ba?

/Ra/ Ragasa ng gawain ay napapadali ngunit

/Sa/ sarili ay nabubulag, nabubulag sa modernong panahon

/Ta/ Tama pa nga ba ito?

/U/ Ugat nito'y maaaring pagdurusa

/Wa/ Walang nakakaalam kung anong hangganan

/Ya/ Yayakapin na lamang ba ang nakasanayan?

Sa pagkupas ng panahon

Takdang oras ay papaahon

Ano na ang magiging wakas

Sa mundong binalot ng malagim na bakas

Ngunit teknolohiya'y hindi maaaring masisi

Dahil tao ang saksi

Na tayo ang totoong pinagmulan ng pagdurusa ng ating sanlibutan

Bagama't hindi pa rin namulat sa katotohanan

Kaya ikaw, patuloy ka bang magiging bulag?

Marami na ang naapektuhan

Susunod ka ba sa kanila?

O isa ka sa kanila?

Halina't wakasan, ang maling sistema kung hindi

ABaKa, ito na ang katapusan.